Pantis + Death Whistle

PANTIS Y DEATH WHISTLE EN CONCIERTO EN GALICIA

PANTIS presenta o seu segundo disco, memoria nova (2025), unha panorámica con fronteiras difusas entre o vivido e os puntos cegos do recordo. memoria nova narra historias de inadaptadxs, “misfits”, coa ansia como eixo, a cabalo entre o rural, a pista, as aforas, o polígono, a circunvalación; co motor sempre presente, o coche e, sobre todo, o desprazamento. Marcado polo post punk, o selo 4AD e a escea coldwave, o disco transita entre distintos espectros de memoria, integrando o colectivo a través de rexistros perdidos no vórtice de Internet, arquivos persoais ou voces que volven. No escenario Pantis establece un vínculo motor co espazo e o público a través do corpo, a exhalación e o movemento. A visceralidade convive coa intimidade e os ritmos petan no peito, entre o baile e o arrepío.

Pantis é o proxecto de Rubén Domínguez, músico e realizador audiovisual galego, no que transita, desde o pop, pola electrónica primixenia, o postpunk a coldwave e outros horizontes dispares. Desde a saída de Pranto (2016) leva xirando de forma intermitente e publicando pequenas pezas como o EP Baldíos (2019) ou o álbum recén estreado memoria nova (2025), todos eles con Prenom, o colectivo do que fai parte. Neste tempo ten tocado en habitacións, galpóns, baretos e sitios ben diferentes como Ríoseco en Asturies, Berlín ou Portugal; compartindo escenario con Aviador Dro, Panda Bear, Sonic Boom ou abrindo para Cold Cave na Meet Factory de Praga.